以前，男兒最怕入錯行，女兒最怕嫁錯郎，一錯，返唔到轉頭，呢世人就係咁先。
而家，男兒可以去再培訓，或者唔入行，做隱閉青年，女兒歡喜的可以嫁幾次，甚至唔嫁，自己養自己都得。
講真，而家打工，唔認真做既人，當份工係佢第二個阿媽，不過係俾多d零用錢既。一出糧，買衫買鞋買錶買車買買買，即刻清袋，又等下個出糧日。月月清，月月淨，乾淨個淨。有心機做野既，你估又真係無呢份工唔得咩？為咩？為與趣，為挑戰，好玩咋！做咁辛苦做咩？無咁悶嘛！人生苦短，吃喝玩樂又唔玩得幾多，又或者無咁多錢，咪做野囉！係，係叫玩世不恭。但我地做野，唔係向人交代，係向自己交代。話晒係讀過幾個字書，責任呀專業操守呀都識得d，一句話唔撈，都有晒交帶，辭都辭得型過人，老闆你仲有咩野講？！辭咗職，休息一陣，一頭半個月又或者一年半載，都話唔埋架，番嚟再為自己重新定位，慢慢再搵「適合自己」既路，其實咪又係同自己搵個藉口抖抖！你都唔使同我地坳，有個藉口送過你咪算係咁囉，唔係既話一個唔該，照直講我唔想做野住，你就真係啞口無言，唔知俾咩反應好！所以，當你見我地同你講埋一堆二堆廢話時，你嗯一聲就得架啦，咩都唔使講！唔該晒！
而o個d咩「一生一世」，跟本就唔係「人話」。又唔係淨係傻仔先至結婚既，不過結咗你又唔好咁樂觀諗一生一世咯。我地呢一代，一出世不論貧富，也算衣食無憂。物質，我地唔係講有定無，而係比較好定無咁好，有幾好。好啦，你話你揀咗呢個，無錯呀當時你真係諗住佢最好架，但係「世界發展一日千里」，幾日之後又真係俾你搵到個更好既，同而家呢個一比，無得比啦！咁又有咩好講？因誤會而結合因了解而分開，呢句啱架！誤會眼前人係最好既咪結合囉，了解呢個世界仲有更多更好既咪分開囉！性格不合而分手，轉個頭又搵過另一個，o個句性格不合只係花心既代名詞啫。唔好話我涼薄，我只不過肯清醒一d，你唔係咁諗就證明你唔肯面對現實，咁好辛苦架！食快餐大既你會唔會話食開大家樂一定要搵番大家樂死都唔入大快活食吖？唔會架嘛係咪先！
No comments:
Post a Comment